លោក អ៊ុំ សំអាន ហៅគម្រោងរបប ហ៊ុន សែន រៀបចំ​ខួប​ ៧​ មករា ​រួម​គ្នា​​ជាមួយ ​​វៀតណាម ថា«ខួប យួន ឈ្លានពានកម្ពុជា»

លោក អ៊ុំ សំអាន រិះគន់​​របប​​ភ្នំពេញ​​ដែល​​ត្រៀម​​រៀបចំ​ខួប​ ៧​ មករា ​រួម​គ្នា​​ជាមួយ​​វៀតណាម

(RFA Khmer / ដោយ មាន ប្ញទ្ធិ / ០៩ ធ្នូ ២០១៨)
តំណាងរាស្ត្រ​ជាប់ឆ្នោត​មកពី ​គណបក្ស​សង្គ្រោះជាតិ ដែល​សកម្ម​ខាង ​បញ្ហា​ព្រំដែន និង ​អន្តោប្រវេសន៍ លោក អ៊ុំ សំអាន ​រិះគន់​របប​ក្រុង​ភ្នំពេញ​​ខ្លាំងៗ ដែល​គ្រោង​នឹង​រៀបចំ​រួមគ្នា ​ជាមួយ​ប្រទេស ​វៀតណាម ដើម្បី​ប្រារព្ធ​ខួប​លើក​ទី ៤០ ​ឆ្នាំ នៃ​ការ​ដួល​រលំ​ទៅ ​នៃ​របប​ខ្មែរក្រហម នៅ​ថ្ងៃទី ៧ ខែ​មករា ខាង​មុខ​នេះ។ លោក ​ថាការរៀបចំ​ទិវា​រួមគ្នា​នេះ នឹង​មិន​ធ្វើ​ឲ្យ​កម្ពុជា​ចំណេញ​អ្វី​នោះ​ទេ  តែ​គឺជា​ការ​បង្ហាញ​ការ​ដឹងគុណ ឬ​ជំពាក់​គុណ​របស់​របប​នេះ ចំពោះ​ប្រទេស​វៀតណាម ​មិន​ចេះ​ចប់​មិន​ហើយ​ទៅវិញ​ទេ។

លោក អ៊ុំ សំអាន ថ្លែងប្រាប់​អាស៊ីសេរី កាលពី​យប់​ថ្ងៃ​ទី៩ ធ្នូ ថា រឿង​ដែល​វៀតណាម​ចង់​ឲ្យ​កម្ពុជា​រៀបចំ​ខួប​លើក​ទី ៤០​ ឆ្នាំ​រួមគ្នា​នេះ គឺជា​សារសំខាន់​មួយ​ដែល​មេដឹកនាំ​របប​កុម្មុយនិស្ត​វៀតណាម​ចង់​រំឭក​កម្ពុជា​ថា មេដឹកនាំ​សព្វថ្ងៃ​នេះ នៅតែ​ជាប់ជំពាក់​គុណ​របស់​វៀតណាម ដែល​បាន​លើក​បន្តុប​ពួកគេ​ឲ្យ​បាន​ឡើង​កាន់​អំណាច​រហូត​មក​ទល់​ពេល​សព្វថ្ងៃ​នេះ៖ «ខ្ញុំ​យល់​ថា ការ​ចង់​រៀបចំ​ខួប ៧ មករា រួមគ្នា​ជាមួយ​កម្ពុជា​ហ្នឹង គឺ​វៀតណាម​ចង់​រំឭក​កម្ពុជា​ថា កម្ពុជា គឺ​ជំពាក់​គុណ​វៀតណាម ដែល​វៀតណាម​បាន​បញ្ជូន​កងទ័ព​រាប់​ម៉ឺន​នាក់ កាលពី​ទសវត្សរ៍​ទី៨០ មក​រំដោះ​កម្ពុជា​ពី​របប​ខ្មែរក្រហម។ ដូច្នេះ ត្រូវតែ​ដឹងគុណ​វៀតណាម ត្រូវតែ​កាត់​ដី​ឲ្យ​វៀតណាម ត្រូវតែ​ឲ្យ​ជនជាតិ​វៀតណាម​រស់នៅ​កម្ពុជា។ នេះ គឺ​គេ​រំឭក​គុណ​របស់​គេ។ យើង​ដឹង​ហើយ​កាលពី​ទសវត្សរ៍​ទី​៨០ ហ្នឹង កងទ័ព​វៀតណាម នៅ​កម្ពុជា ហើយ​យើង​ចុះសន្ធិសញ្ញា​ទៅលើ​ឯកសារ​មួយ​ចំនួន​ទាក់ទង​នឹង​បញ្ហា​ព្រំដែន ដែល​ធ្វើ​ឲ្យ​ខាតបង់​ទឹកដី​កម្ពុជា​នៅ​តាម​ព្រំដែន»។

លោក អ៊ុំ សំអាន មាន​ប្រសាសន៍​បន្ត​ថា ការ​រៀប​ចំ​នេះ មិន​មាន​ផ្ដល់​ផល​ចំណេញ​អ្វី ដល់​កម្ពុជា​នោះ​ទេ ក្រៅពី​អ្វី​ដែល​លោក​ថា កម្ពុជា​ត្រូវតែ​បន្ត​អនុវត្ត​ស្រប​តាម​មហិច្ឆតា​របស់​អតីត​មេដឹកនាំ កុម្មុយនិស្ត​វៀតណាម​លោក ហូ ជីមិញ ដែល​ចង់​យក​កម្ពុជា វៀតណាម និង​ឡាវ នៃ​តំបន់​ឥណ្ឌូចិន ក្លាយ​ទៅជា​ប្រទេស​តែមួយ​នៅ​ពេល​អនាគត ដែល​វៀតណាម​ជា​អ្នកគ្រប់គ្រង។

ការរិះគន់​ខ្លាំងៗ​របស់​តំណាងរាស្ត្រ​គណបក្ស​សង្គ្រោះជាតិ រូប​នេះ ធ្វើឡើង​ស្រប​ពេល​ដែល​របប​ក្រុងភ្នំពេញ ហៅ​ការ​ប្រារព្ធ​រួមគ្នា​នេះ ថា​ដើម្បី​រំលឹក​ការ​តស៊ូ​រួមគ្នា ដើម្បី​រំលំ​របប​ប្រល័យពូជសាសន៍​ប៉ុល ពត។ នេះ​បើ​យោង​តាម​សេចក្ដី​ប្រកាស​ព័ត៌មាន​របស់​ក្រសួង​ការបរទេស​កម្ពុជា ផ្សាយ​កាលពី​ថ្ងៃ​ទី៨ ធ្នូ ជុំវិញ​លទ្ធផល​នៃ​ដំណើរ​ទស្សនកិច្ច​ផ្លូវការ ៣​ថ្ងៃ របស់​លោក ហ៊ុន សែន ទៅ​វៀតណាម ពី​ថ្ងៃ​ទី៦ ដល់​ថ្ងៃទី៨ ធ្នូ កន្លង​ទៅ​នេះ។

ព័ត៌មាន​នៃ​ការ​គ្រោង​រៀបចំ​រួមគ្នា​នៃ​ខួប​លើក​ទី៤០ នៃ​ទិវា​ដែល​ប្រទេស​ទាំងពីរ​ហៅថា «​ជ័យជម្នះ​លើ​របប​ប្រល័យ​ពូជសាសន៍» នេះ។ ដំបូង​ឡើយ​ត្រូវ​បាន​ទីភ្នាក់ងារសារព័ត៌មាន​វៀតណាម រាយការណ៍​ឲ្យ​ដឹង កាលពី​អំឡុង​ដំណើរ​ទស្សនកិច្ច​របស់​លោក ប្រាក់ សុខុន ទៅ​វៀតណាម កាលពី​ចុងខែ​វិច្ឆិកា ថា​គឺជា​សំណើ​របស់​នាយករដ្ឋមន្ត្រី វៀតណាម លោក ង្វៀន សួនហ្វុក ដើម្បី​ជា​ការ​ឆ្លុះបញ្ចាំង​ពី​សាមគ្គីភាព​ជ្រាលជ្រៅ និង​លើកកម្ពស់​ការ​យល់ដឹង​រវាង​ប្រជាជន នៃ​ប្រទេស​ទាំងពីរ​អំពី​សារៈសំខាន់​នៃ​ប្រវត្តិសាស្ត្រ​នេះ ខណៈ​ថ្ងៃ​ទី៧ មករា គឺជា​ថ្ងៃ​ដ៏​ចម្រូងចម្រាស​មួយ​នៅ​កម្ពុជា ដោយសារ​វៀតណាម បាន​លើកទ័ព​ជាង ២​សែន​នាក់ ចូល​មក​លុកលុយ​កម្ពុជា ដោយ​លើក​បន្តុប​ក្រុម​បក្ខពួក​របប​លោក ហ៊ុន សែន សព្វថ្ងៃ ឲ្យ​ឡើង​កាន់​អំណាច ក្រោម​ការ​បន្ត​ត្រួតត្រា​របស់​ខ្លួន ដែល​មាន​លក្ខណៈ​ជា​អាណានិគម​មក​លើ​កម្ពុជា​អស់​រយៈពេល ១០ឆ្នាំ។

លោក អ៊ុំ សំអាន គូស​បញ្ជាក់​ថា សម្រាប់​គណបក្ស​សង្គ្រោះ​ជាតិ គណបក្ស​នេះ​មិន​ចង់​ឃើញ​ការរៀបចំ​ពិធី​នេះ​រួមគ្នា​នោះ​ឡើយ ព្រោះ​ហេតុការណ៍​នេះ បង្ហាញ​ថា វៀតណាម​នៅ​តែ​មាន​ឥទ្ធិពល​មក​លើ​កម្ពុជា​ដដែល។

ក្រៅពី​ការ​ឯកភាព​រៀបចំ​រួមគ្នា​ទិវា ៧ មករា​នេះ សារព័ត៌មាន​វៀតណាម​រាយការណ៍​ថា ភាគី​ទាំង​ក៏​មាន​បំណង​ពន្លឿន​ការ​បិទ​បញ្ចប់​ការកំណត់​បង្គោល​ខណ្ឌ​សីមា និង​បោះ​បង្គោល​ព្រំដែន​ដីគោក ដែល​មាន​ប្រវែង ១.២៧០ គីឡូម៉ែត្រ ឲ្យ​រួចរាល់​ត្រឹម​ឆ្នាំ២០១៩ ខណៈ​ភាគី​ទាំងពីរ នឹង​ធ្វើ​ការ​រួម​គ្នា​ដើម្បី​ចុះហត្ថលេខា​លើ​ឯកសារ​ផ្លូវការ​ចំនួន​ពីរ ដើម្បី​ផ្ដល់​ភាព​ស្របច្បាប់​ដល់​ការកំណត់​ខណ្ឌសីមា និង​ការ​បង្គោះ​បង្គោល​ព្រំដែន​ដែល​ភាគី​ទាំងពីរ​សម្រេច​បាន ៨៤​ភាគរយ កាល​ពី​កន្លង​ទៅ​នោះ។ សេចក្ដី​ប្រកាស​ព័ត៌មាន​របស់​ក្រសួង​ការបរទេស​កម្ពុជា មិនបាន​រាយការណ៍​លម្អិត​ពី​រឿង​នេះ​ឡើយ ដោយ​គ្រាន់តែ​ឲ្យ​ដឹង​ថា លោក ហ៊ុន សែន និង​លោក ង្វៀន សួនហ្វ៊ុក បាន​ពិភាក្សា​គ្នា​យ៉ាង​ទូលំទូលាយ​អំពី​ការ​ដោះស្រាយ​បញ្ហា​ព្រំដែន​នេះ និង​បាន​ស្វាគមន៍​នូវ​សមិទ្ធផល​នៃ​ការងារ​ខណ្ឌសីមា និង​បោះ​បង្គោល​ព្រំដែន​កន្លងមក ហើយ​បាន​ឯកភាព​ជំរុញ​ពន្លឿន​ការ​ដោះស្រាយ​បញ្ចប់​បញ្ហា​ព្រំដែន​ដីគោក ដែល​នៅ​សេសសល់​ចំនួន ១៦​ភាគរយ​ទៀត។ ក្រសួង​ការបរទេស​ថា ការ​ដោះស្រាយ​នេះ គឺ​ផ្អែក​តាម​ស្មារតី​នៃ​មិត្តភាព និង​ភាពជា​អ្នកជិតខាង​ល្អ សំដៅ​កសាង​ខ្សែបន្ទាត់​ព្រំដែន​រួម​ប្រកប​ដោយ មិត្តភាព សន្តិភាព ស្ថិរភាព និង​សហប្រតិបត្តិការ​រឹងមាំ​យូរអង្វែង​សម្រាប់​ប្រជាជន​ជំនាន់​ក្រោយៗ។

ជុំវិញ​បញ្ហា​បោះ​បង្គោល​ព្រំដែន​នេះ លោក អ៊ុំ សំអាន ប្រកាស​ជំហរ​ថា លោក​មិន​ទទួលស្គាល់​ដាច់ខាត​នូវ​រាល់​អ្វី​ដែល​កម្ពុជា និង​វៀតណាម សម្រេច​បាន​ក្នុង​ការកំណត់​ខណ្ឌសីមា និង​ការ​បោះ​បង្គោល​ព្រំដែន​ទាំងនេះ ដោយ​ហេតុការណ៍​របប​ក្រុងភ្នំពេញ​ធ្វើឡើង​តាមរយៈ​អនុសញ្ញា​ព្រំដែន​កម្ពុជា វៀតណាម ដែល​កម្ពុជា​បាន​ចុះ​ដោយ​ខុសច្បាប់​ជាមួយ​វៀតណាម​កាល​ពី​ពេល​អតីត​កាល ឲ្យ​ព្យាយាម​ធ្វើ​ឲ្យ​ស្របច្បាប់​ឡើងវិញ​កាលពី​ឆ្នាំ​២០០៥ កន្លង​ទៅ តាមរយៈ​សន្ធិ​សញ្ញា​​បំពេញ​បន្ថែម​នៃ​ព្រំដែន​រវាង​កម្ពុជា និង​វៀតណាម​នេះ។ លោក អ៊ុំ សំអាន ព្រមាន​ថា គណបក្ស​សង្គ្រោះជាតិ នឹង​សើរើ​ឡើងវិញ​នូវ​រាល់​ដំណើរ​ការ​កំណត់​​ខណ្ឌសីមា និង​ការ​បោះ​បង្គោល​ព្រំដែន​ទាំងអស់​នេះ ដោយ​ផ្អែក​តាម​កិច្ចព្រមព្រៀង​សន្តិភាព​ក្រុង​ប៉ារីស​ឆ្នាំ១៩៩១ ជា​គោល ប្រសិនបើ​គណបក្ស​នេះ​មាន​ឱកាស​មក​ឡើង​កាន់​អំណាច​នា​ពេល​អនាគត​នោះ៕

.

Advertisements
Posted in Nokor | Tagged , , | Leave a comment

រឿង​ព្រំដែន ស្រុកកំណើត ហេង សំរិន ជុំវិញការដោះដូរ ជាមួយ​វៀតណាម

ទរឿង​ព្រំដែន ស្រុកកំណើត ហេង សំរិន ជុំវិញការដោះដូរ ជាមួយ​វៀតណាម
(ដោយ Moung Sony៖ បេសសកម្ម ១០០រាត្រី! រាត្រី៣២, ៣៣ /ថ្ងៃ ១១ ធ្នូ ២០១៨)

នៅខាងក្រោមនេះជាការអង្កេតរកឃើញ របស់ក្រុមការងារ ១០០រាត្រី ដែលមានខ្លឹមសារដូចតទៅ៖

I/ ការរកឃើញ

ទី១. ពលរដ្ឋនៅក្នុងតំបន់បានអះអាងថា អជ្ញាធរវៀតណាម តែងតែចូលល្បាតក្នុងដីខ្មែរ ស្ទើរជារៀងរាល់ថ្ងៃ។

ទី២. ប្រជាពលរដ្ឋដែលរស់នៅក្នុងតំបន់នោះ បានអះអាងថា ខ្លួនពុំអាចធ្វើអ្វីនៅទីនោះ បានទេ ដូចជាការដាំកូនស្វាយ កាប់ឈើជាដើម ដោយមានការរារាំង ពីសំណាក់អាជ្ញាធរវៀតណាម។

ទី៣. កម្ពុជា បានបាត់បង់វត្តត្នោត ដែលជាវត្តបុរាណ្យ ទៅប្រទេសវៀតណាម ដែលមានចម្ងាយ ពីបង្គោលព្រំដែន លេខ ១២៧ ដែលបានបោះ ក្នុងឆ្នាំ២០០៨ ប្រមាណជាង ២ គីឡូម៉ែត្រ តែតាមពិតទៅវត្តត្នោតនោះ ស្ថិតក្នុង ភូមិអន្លុងជ្រៃ ភាគខាងកើត ស្រុកពញាក្រែក ត្បូងឃ្មុំ (តាមការអះអាងរបស់ពលរដ្ឋ នៅក្នុងតំបន់)។

ទី៤. ប្រជាពលរដ្ឋនៅរស់នៅក្នុង ភូមិថ្លុកត្រាច និង ភូមិអន្លុងជ្រៃ ផ្ទាល់ សុទ្ឋតែបានអះអាងថា ខ្លួនបានបាត់បង់ដី ស្រែចម្ការ ទៅប្រទេសវៀតណាម ក្នុង ភូមិអន្លុងជ្រៃ និង ភូមិថ្លុកត្រាច (​ភាគខាងកើតភូមិ) ស្រុកកំណើត លោក ហេង សំរិន ប្រធានរដ្ឋសភាជាតិ ដែលសព្វថ្ងៃ ក្នុងប្រទេស​វៀតណាម ខណ្ឌដោយបង្គោលព្រំដែនថ្មី ដែលបោះក្នុងឆ្នាំ២០០៨ គឺបង្គោលលេខ ១២៥ ដល់បង្គោល លេខ ១៣១។ ដី ស្រែចម្ការ ដែលក្រុមគ្រួសារគាត់បានធ្វើការដាំដុះនៅទីនោះ ជាយូរណាស់មកហើយ ដែលអាជ្ញាធរវៀតណាម បានបញ្ឈប់ពួកគាត់មិនឱ្យធ្វើស្រែចម្ការ រវាងនៅចន្លោះឆ្នាំ១៩៨៥ និងបានបញ្ឈប់ទាំងស្រុង នៅពេលដែលបានបោះបង្គោលព្រំដែនរួច នៅឆ្នាំ២០០៨។

ទី៥. បើទោះបីជាមានការដុះដូរ ភូមិអន្លុងជ្រៃ និងភូមិថ្លុកត្រាច នៅឃុំកក់ ស្រុកពញាក្រែក មកប្រទេសកម្ពុជាវិញ ដែលវៀតណាម បានអះអាងថា ជារបស់ខ្លួននោះ ក៏ប្រទេសកម្ពុជា មិនបានទទួលផ្ទៃដី ពេញលេញ នូវភូមិទាំង២ នោះដែរ។ គឺទទួលបានត្រឹមភូមិថ្លុកត្រាច ខាងលិចរីឯខាងកើត បានបាត់បង់ទៅប្រទេសវៀតណាម និងទទួលបានភូមិអន្លុងជ្រៃ ខាងលិច រីឯខាងកើតបានទៅប្រទេសវៀតណាម។ មូលហេតុនេះ ឯងបានជាប្រជាពលរដ្ឋដែលរស់នៅក្នុងតំបន់ផ្ទាល់ បានបាត់បង់ដី ស្រែចម្ការ របស់ខ្លួន ដែលធ្លាប់ប្រកបផលតាំងពីយូរណាស់មកហើយ។ ក្រុមការងារ  ១០០រាត្រី មិនបានរកឃើញថាផ្ទៃដី នៅភូមិថ្លុកត្រាច ខាងកើត និងអន្លុងជ្រៃខាងកើត ដែលបាត់បង់ទៅវៀតណាមនោះ ចំនួនប៉ុន្មាននោះទេ។ (តាមការអះអាងរបស់ប្រជាពលរដ្ឋ ក្នុងតំបន់)។

ទី៦. បងប្អូនប្រជាពលរដ្ឋ ដែលបានរស់នៅក្នុងភូមិអន្លុងជ្រៃ និងភូមិថ្លុកត្រាច បានរៀបរាប់ថាក្រៅពីការបាត់បងចំនែកខ្លះនៃ ភូមិអន្លុងជ្រៃ និងភូមិថ្លុកត្រាច មានភូមិចំនួនផ្សេងទៀតដែលវៀតណាម បានយកនោះគឺ ភូមិត្នោត និងភូមិវត្តត្នោត ដែលភូមិទាំង២ នេះ មិនបាននិយាយរៀបរាប់អ្វី ពីថ្នាក់ដឹកនាំប្រទេសឡើយ។

ទី៧. ប្រជាពលរដ្ឋដែលរស់នៅក្នុងភូមិជន្លុងជ្រៃ និងភូមិថ្លុកត្រាច មិនបានទទួលព័ត៌មានអំពីការដោះដូរភូមិរបស់ខ្មែរ ទៅឱ្យប្រទេសវៀតណាម និងមិនបានចូលរួមសម្រេចផង ដែលក្នុងការដោះដូរភូមិទាំងនោះ។

ទី៨. ច្រកព្រំដែនត្នោត ដែលជាច្រករបៀង មានការដឹកទំនិញ ចេញចូលសេរី ពីវៀតណាម និងកម្ពុជា មន្ត្រីព្រំដែន ខ្មែរទទូលបានប្រាក់ខែតិចតូចគឺត្រឹម ១២០០០០០ រៀល ឬស្មើនឹង ៣០០ ដុល្លា ដែលប្រាក់ខែនេះ មានចំនួនតិចតួច ហើយអាចនាំអោយមានអំពើពុករលួយ។ ដោយឡែកមន្ត្រីបុស្តិ៍របៀងវៀតណាម ទទួលបានប្រាក់ខែជាង ១២០០ដុល្លា ដែលច្រើនជាងកម្ពុជា ៤ ដងឯនោះ។

II/ សេចក្តីសន្ធិដ្ឋាន

បើទោះបីជាមានការអះអាង ពីសំណាក់ ឯកឧត្តម វ៉ា គីមហុង នៅថ្ងៃទី ១៩ ខែមិថុនា ឆ្នាំ ២០១២ តាមរយៈសារពត័មានវិទ្យុអាស៊ីសេរី​ថា ភូមិអន្លុងជ្រៃ ភូមិថ្លុកត្រាច ដែលត្រូវបានគេគូស ចូលក្នុងផែនទីបារាំង មានមួយខ្នាតមួយ លើមួយរយពាន់ របស់ក្រុមប្រឹក្សាភូមិសាស្ត្រឥណ្ឌូចិន ទៅហើយ។ យ៉ាងណាយើងមិនដែលបានឃើញថា មានការយកផែនទី១ ខ្នាតលើ ១០០ ពាន់នោះ មកបកស្រាយ​ជុំវិញបញ្ហាការដោះដូរភូមិនេះដែរ។

ហេតុដូចនេះ ប្រជាពលរដ្ឋខ្មែរទាំងមូល រួមទាំងពលរដ្ឋរងគ្រោះ ដែលបានបាត់បង់ដី ស្រែ ចម្ការរបស់ខ្លួន មិនដឹងអ្វីទាំងអស់ អំពីការពិតនៃរឿងនេះ។ ហើយប្រជាពលរដ្ឋ ដែលរងគ្រោះពីការបាត់បង់ដីស្រែចម្ការ ទៅវៀតណាម ក៏មិនបានទទួលយុត្តិធម៌អ្វីដែរ។ ប្រសិនបើយោងតាមការសិក្សាស្រាវជ្រាវខាងលើ យើងអាចទាញសេចក្តីសន្និដ្ឋានបានថា វៀតណាមនៅតែមានព្រៀបជាងកម្ពុជា ព្រោះហេតុថា ភូមិដែលវៀតណាម អោយមកកម្ពុជាវិញនោះ វៀតណាម នៅតែគ្រប់គ្រង មិនព្រមចាត់ទុកជាដែនអធិបតេយ្យ របស់កម្ពុជាពិតប្រាក រីឯភូមិដែលកម្ពុជា ត្រូវដោះដូរជាថ្នូរយក ភូមិអន្លុងជ្រៃ និងធ្លុកត្រាច នោះ មិនដឹងភូមិមួយណា ដែលមិនត្រូវបង្ហាញជាសាធារណ:។ ហើយប្រសិនបើកម្ពុជា បានប្រគល់ភូមិ២ ទៅប្រទសវៀតណាម ជាថ្នូរ និងការដោះដូរភូមិថ្លុកត្រាច និងអន្លុងជ្រៃ ពិតប្រាដកមែន វៀតណាម គួរលែងលូកលាន់ដែន​អធិតេយ្យ​កម្ពុជា នៅក្នុងភូមិនោះបន្តទៀត។

III/ អនុសាសន៍៖

ទី១. រាជរដ្ឋាភិបាល ត្រូវរៀបចំក្រុមសិក្សាស្រាវជ្រាវ ឯករាជ្យពិតប្រាកដ និងមានជំនាញវិជ្ជាជីវ: ច្បាស់លាស់ មកពីស្ថានប័នអន្តរជាតិ ដូចជាក្រសួងផែនការ និងស្ថានប័នអន្តរជាតិណាល្បីៗ រួចប្តឹងទៅតុលាការ ទីក្រុងឡាអេ។

ទី២. រាជរដ្ឋាភិបាល អនុញ្ញាតិអោយឯកឧត្តមបណ្ឌិត សុខ ទូច ដែលមិនជាអ្នកជំនាញត្រឹមត្រូវ និង ធ្វើការតាមអារម្ម មកសិក្សាអំពីបញ្ហាផែនទីនោះ ដូចនេះដើម្បីអោយភ្លឺច្បាស់ប្តូរយុទ្ឋសាស្ត្រក្នុង​ការសិក្សាអំពីបញ្ហាព្រំដែន។

ទី៣. ប្រសិនបើមានការដោះដូរភូមិមែននោះ រដ្ឋាភិបាលគួរសុំការអនុញ្ញាតិពីរដ្ឋសភា និងមិនគួរបំពានច្បាប់ព្រហ្មទណ្ឌ ក្នុងមាត្រា ៤៤0 ដែលបានចែងថា (អំពើប្រគល់​អោយរដ្ឋបរទេស ឬ ភ្នាក់ងារ​បរទេស នូវដែនដីជាតិទាំងស្រុង ឬុមួយផ្នែកត្រូវផ្តន្ទាទោស ដាក់ពន្ឋធនាគារអស់មួយជីវិត)។

ទី៤. រាជរដ្ឋាភិបាល គួរបន្ថែមប្រាក់ខែ ដល់មន្ត្រីរាជការ ដែលយាម និងការពារតាមព្រំដែនកម្ពុជា​ យ៉ាងហោចណាស់អោយបានស្នើរ មន្ត្រីវៀតណាម។

ទី៥. រាជរដ្ឋាភិបាលគួរតែផ្លាស់ប្តូរមន្ត្រីយាមព្រំដែន ក្នុងរយៈពេល ២អាទិត្យម្តង ដើម្បីកុំអោយមានអំពើពុករលួយ និងឃុបឃិត ជាមួយបរទេស។

ទី៦. រាជរដ្ឋាភិបាល គួរសិក្សាអោយបានលំអិត ចំពោះមន្ត្រីណាដែលឃុបឃិត ជាមួយបរទេស យក​មកដាក់ទោសតាមច្បាប់ព្រហ្មទណ្ឌ។

ទី៧. រាជរដ្ឋាភិបាល គួរចេញបំរាមហាមឃាត់មន្ត្រីអជ្ញាធរវៀតណាម ដែលចេញចូលល្បាត ក្នុងទឹកដីខ្មែរ ដើម្បីរក្សាជំហរឯករាជ្យ របស់ប្រទេសកម្ពុជា ក្នុងការពារព្រំដែន។

ក្រុមការងារ ១០០ រាត្រី សង្ឃឹមថារបាយការណ៍ស្រាវជ្រាវនេះ អាចចូលរួមចំនែកក្នុងការសិក្សា អំពីបញ្ហានៃការដោះដូរថ្លុកត្រាច និងអន្លុងជូនដល់រដ្ឋាភិបាល និងប្រជាពលរដ្ឋទូទៅ ហើយក៏បានជាឯកប្រវត្តិសាស្ត្រ សំរាប់ក្មេងជំនាន់ក្រោយផងដែរ។

កំណត់ចំណាំ៖ ក្រុមការងារ ១០០រាត្រី សូមស្វាគមន៍ ចំពោះមតិរិះគន់របស់បងប្អូនជនរួមជាតិក្នុងន័យស្ថាបនា និងក៍សូមអំពាវនាវអោយបងប្អូនជនរួមជាតិ មេត្តាចូលរួមទាំងអស់គ្នា ដើម្បីបន្តគាំទ្របេសកម្មលោកបណ្ឌិតកែមឡី ១០០រាត្រី និងគ្រួសារខ្មែរ។

Posted in Nokor | Tagged , , , , | Leave a comment

ក្រុមប្រឹក្សាឃ្លាំមើលកម្ពុជា ប្រឆាំងជំទាស់របប ហ៊ុន សែន បន្តបោះបង្គោលព្រំដែន ជាមួយ​វៀតណាម

Capturedfere

ក្រុមប្រឹក្សាឃ្លាំមើលកម្ពុជា សូមប្រឆាំងជំទាស់ជាដាច់ខាត ចំពោះការបន្តបោះបង្គោលព្រំដែន​​កម្ពុជា-វៀតណាម ដែលធ្វើឡើងដោយរបបលោក ហ៊ុន សែន ជាមួយវៀតណាម ពីព្រោះថា ភាគីរបស់របបលោក ហ៊ុន សែន មិនដែលមានប្រៀបក្នុងការចរចាដោះស្រាយរឿងនេះ​ម្តងឡើយ។

ជាទូទៅ​ វៀតណាម តម្រូវឲ្យរបបលោក ហ៊ុន សែន ទទួលស្គាល់លើឯកសារ និងសន្ធិសញ្ញានានា តាំងពីឆ្នាំ១៩៧៩ ឆ្នាំ១៩៨២ ឆ្នាំ១៩៨៣ និងសន្ធិសញ្ញាឆ្នាំ១៩៨៥។ ភាគីរបបលោក ហ៊ុន សែន មិនដែលប្រឆាំងជំទាស់នឹង​វៀតណាម ម្តងណាទេ។ ហើយសន្ធិសញ្ញាខុសច្បាប់ ឆ្នាំ១៩៨៥ ត្រូវបានយកទៅអនុម័តឡើងវិញ យ៉ាងចម្រូងចម្រាស់បំផុត នៅឆ្នាំ​២០០៥ ដោយឈ្មោះថ្មីថា «សន្ធិសញ្ញាព្រំដែនបំពេញបន្ថែម លើសន្ធិសញ្ញាព្រំដែនឆ្នាំ​១៩៨៥» ដោយភ្ជាប់មកជាមួយនូវ ផែនទីខុសច្បាប់ ខ្នាត ១/៥០.០០០ (UTM) និងផែនទី ១/១០០.០០០ (Bonne បោះពុម្ពនៅវៀតណាម)។

ក្រុមប្រឹក្សាឃ្លាំមើលកម្ពុជា សូមក្រើនរំលឹករបបលោក ហ៊ុន សែន ជាថ្មីថា «ត្រូវបញ្ឈប់បោះបង្គោល​ព្រំដែន ជាមួយវៀតណាម» ជាបន្ទាន់ ដោយរង់ចាំកម្ពុជា មានឯកភាពផ្ទៃក្នុងជាតិ, មានឯកភាពនយោបាយ, មាន​សង្គមស៊ីវិល និងមានអ្នកជំនាញការព្រំដែនខ្មែរពីគ្រប់ភាគី ចូលរួមប្រឹក្សាយោបល់ និងពិនិត្យឡើងវិញ នូវការបោះបង្គោលព្រំដែនកន្លងទៅ។

ករណីរបបលោក ហ៊ុន សែន នៅតែមានៈបន្តបញ្ចប់រឿងបោះបង្គោលព្រំដែន រួមទាំងរឿងកោះត្រល់ផង នោះលោក ហ៊ុន សែន និងរបបរបស់លោក នឹងទទួលខុសត្រូវចំពោះប្រវត្តិសាសត្រ គឺមិនខុសពីស្តេច ជ័យជេដ្ឋា​ទី២ ជាមេដឹកនាំមានឈ្មោះ «ក្បត់ជាតិ» ក្នុងប្រវត្តិសាស្ត្រខ្មែរ លើទឹកដីព្រៃនគរ។

យើងខ្ញុំសូមបញ្ជាក់ជំហរថា នៅពេលកម្ពុជា មានឯកភាពជាតិ មានមេដឹកនាំល្អ ដែលស្រឡាញ់ជាតិ ស្រឡាញ់​ទឹកដី ពេលនោះ កម្ពុជាត្រូវតែសើរើ និងប្តឹប្តល់ទឹកដីខ្មែរដែលបាត់បង់យកមកវិញ រួមទាំងកោះត្រល់​ផង ទៅតាមយន្តការអន្តរជាតិ តាមមានកិច្ចព្រមព្រៀងក្រុងប៉ារីស និង តុលាការយុត្តិធម៌អន្តរជាតិ។

ម៉ែន ណាត ប្រធានក្រុមប្រឹក្សាឃ្លាំមើលកម្ពុជា

ទីក្រុងគ្រីស្ទានសាន់ (ប្រទេសន័រវេស៍) ១០ ខែធ្នូ ឆ្នាំ២០១៨


មេដឹកនាំ​វៀតណាម ជំរុញឲ្យកម្ពុជាបញ្ចប់ឯកសារ បោះបង្គោលព្រំដែន នៅត្រឹម​ឆ្នាំក្រោយ

Posted in Nokor | Tagged , , , , | Leave a comment

របប ហ៊ុន សែន បិទបាំង​ព័ត៌មាន ដែល​​​​វៀតណាម ​បង្គាប់​ឲ្យ​យកចិត្តទុកដាក់ ជនជាតិ​វៀតណាម នៅ​បឹងទន្លសាប

ប្រាក់ សុខន ហ៊ុន សែន មេដឹកនាំយួន

(ដោយ មាន ប្ញទ្ធិ, FRA Khmer, 30-11-2018)
ក្រសួងការបរទេស មិន​បង្ហាញ​ព័ត៌មាន ដែល​នាយករដ្ឋមន្ត្រី​វៀតណាម លោក ង្វៀន សួនហ្វ៊ុក (Nguyen Xuan Phuc) បាន​បង្គាប់បញ្ជា​ឲ្យ​ប្រមុខ​ការទូត​ខ្មែរ​លោក ប្រាក់ សុខុន ដោះស្រាយ​ការ​បំឡាស់​ទីលំនៅ​របស់​ជនជាតិ​វៀតណាម​ពី​តំបន់​បឹង​ទន្លេសាប ក្នុង​ខេត្ត​កំពង់ឆ្នាំង ក្នុង​សេចក្តី​ប្រកាស​ព័ត៌មាន​ផ្លូវការ។ ការ​ព្យាយាម​បិទបាំង​ព័ត៌មាន​នេះ គឺ​បន្ទាប់ពី​ទីភ្នាក់ងារ​ព័ត៌មាន​វៀតណាម VNA រាយការណ៍​លម្អិត​អំពី​រឿង​នេះ ក្នុង​អំឡុង​ពេល​ដែល​លោក ប្រាក់ សុខុន ធ្វើ​ទស្សនកិច្ច​ផ្លូវការ​រយៈពេល​ពីរ​ថ្ងៃ​ទៅកាន់​ទីក្រុង​ហាណូយ កាលពី​ថ្ងៃទី២៦ ដល់​ថ្ងៃទី២៨ វិច្ឆិកា នេះ ខណៈ​ដែល​ព័ត៌មាន​នេះ រង​ការរិះគន់​យ៉ាង​ខ្លាំង​ពី​សំណាក់​ក្រុម​អ្នកប្រើប្រាស់​បណ្ដាញ​សង្គម។

សេចក្ដីប្រកាស​ព័ត៌មាន​របស់​ ក្រសួង​ការបរទេស ផ្សាយ​ថ្ងៃទី ២៩ វិច្ឆិកា ជុំវិញ​លទ្ធផល​នៃ​ដំណើរ​ទស្សនកិច្ច​ផ្លូវការ​របស់​លោក ប្រាក់ សុខុន ទៅកាន់​ទីក្រុង​ហាណូយ មិនបាន​លើកឡើង​សូម្បី​តែមួយ​ម៉ាត់ អំពី​រឿង​ដែល​មេដឹកនាំ​វៀតណាម​បាន​បង្គាប់បញ្ជា​មក​លើ​លោក ប្រាក់ សុខុន នេះ​ទេ​។ ក្រសួង​ការបរទេស គ្រាន់តែ​លើកឡើង​ថា ក្នុង​ជំនួប​នោះ លោក ង្វៀន សួនហ្វ៊ុក សាទរ​ទំនាក់ទំនង ប្រទេស​ទាំងពីរ និង​បាន​ស្នើ​ឲ្យ​ពង្រឹង​បន្ថែម​នូវ​ទំនាក់ទំនង​នេះ។ ក្រសួង​ក៏​បញ្ជាក់​ថា ការ​ឯកភាព​ក្នុង​ការ​បញ្ចប់​ឲ្យ​បាន​ឆាប់​នូវ​កិច្ចព្រមព្រៀង​ពាណិជ្ជកម្ម​តាម​ព្រំដែន និង​កិច្ច​សម្របសម្រួល​ជំរុញ​ពាណិជ្ជកម្ម​ទ្វេភាគី ដើម្បី​សម្រេច​ទិសដៅ​ពាណិជ្ជកម្ម​ឲ្យ​បាន​ក្នុង​រង្វង់ ៥ ប៊ី​លាន​ដុល្លារ​អាមេរិក ក្នុង​ឆ្នាំ ២០២០ ខាងមុខ​។ ចំណែក​ឯ​វិស័យ​សន្តិសុខ ភាគី​ទាំងពីរ​ក៏​គ្រោង​បង្កើន​ការ​ផ្លាស់ប្ដូរ​ព័ត៌មាន​ឲ្យ​គ្នា​ទៅវិញទៅមក​ទាន់​ពេលវេលា ដើម្បី​បង្ការ និង​ទប់ស្កាត់​នូវ​រាល់​បញ្ហា​គ្រោះធម្មជាតិ ការ​រត់ពន្ធ ការ​ជួញដូរ​ខុសច្បាប់ ឧក្រិដ្ឋកម្ម​ឆ្លងដែន និង​ការ​កាប់​ឈើ​ខុសច្បាប់​ជាដើម។ ក្រសួង​ថា ភាគី​ទាំង​ពីរ​ប្ដេជ្ញា​ខិតខំ​ដោះស្រាយ​ការងារ​រាំងស្ទះ​នានា ដើម្បី​ឈាន​ទៅ​សម្រេច​ការកំណត់​ខណ្ឌសីមា​ព្រំដែន​គោក និង​ការ​ពោះ​បង្គោល​ព្រំដែន​ទាំងស្រុង ដែល​បច្ចុប្បន្ន​ភាគី​ទាំងពីរ​សម្រេច​បាន ៨៤ ភាគរយ ហើយ​នៅសល់ ១៦ ភាគរយ​ទៀត​មិនទាន់​ឯកភាព​គ្នា។

ទស្សនកិច្ច​ផ្លូវការ​របស់​លោក ប្រាក់ សុខុន ទៅកាន់​ប្រទេស​វៀតណាម​នេះ កើតមានឡើង​ស្រប​ពេល​ដែល​ទំនាក់ទំនង​ផ្អែមល្ហែម​ចាក់ទឹក​មិនលិច​រវាង​កម្ពុជា និង​វៀតណាម កំពុង​ស្ថិត​ក្នុង​ស្ថានភាព​ស្រពិចស្រពិល និង​សង្ស័យ​ថា​អាច​នឹង​រង​ការ​ប្រេះឆា ខណៈ​ដែល​របប​ក្រុងភ្នំពេញ កំពុងតែ​បង្កើន​ទំនោរ​ផ្អៀង​កាន់តែ​ខ្លាំង​ឡើងៗ ទៅ​រក​មហាអំណាច​ចិន ដែល​កំពុង​មាន​ជម្លោះ​ជាមួយ​ប្រទេស​វៀតណាម និង​ស្រប​ពេល​ដែល​មាន​ព័ត៌មាន​អំពី​លទ្ធភាព​ដែល​កម្ពុជា​អាច​អនុញ្ញាត​ឲ្យ​ចិន​សាងសង់​មូលដ្ឋាន​កងទ័ពជើងទឹក​នៅ​ខេត្ត​កោះកុង។ ក្រសួងការបរទេស​កម្ពុជា ក៏​មិនបាន​លាតត្រដាង​ឲ្យ​ដឹង​ទេ ថា​តើ​ភាគី​វៀតណាម​មានបាន​លើកឡើង​ពី​កង្វល់​របស់​ខ្លួន ឬ​បាន​ស្ដីបន្ទោស ឬ​សង្កត់​កម្ពុជា ពី​រឿង​ងាគ​ទៅ​រក​ចិន​កាន់តែ​ខ្លាំង​ឡើងៗ​យ៉ាងណា​នោះ​ទេ។ ក៏ប៉ុន្តែ ចំណុច​លេចធ្លោ​មួយ​ក្នុង​សេចក្ដីថ្លែងការណ៍ បាន​រំលេច​ឲ្យ​ឃើញ​ថា ភាគី​ទាំងពីរ បាន​អះអាង​អំពី​ឆន្ទៈ​នយោបាយ​របស់​ខ្លួន ដោយ​មិន​អនុញ្ញាត​ឲ្យ​មាន «​កម្លាំង​អមិត្រ​» ណាមួយ ប្រើប្រាស់​ទឹកដី​របស់​ខ្លួន​ដើម្បី​ប្រឆាំង ឬ​ជ្រៀត​ជ្រែក​ចូល​កិច្ចការ​ផ្ទៃក្នុង​របស់​ប្រទេស​មួយទៀត​នោះ​ឡើយ។ ក្រសួង​មិនបាន​បញ្ជាក់​ទេ​ថា តើ​កម្លាំង​អមិត្រ​នេះ ជា​ប្រទេស​ណាមួយ​ឲ្យ​ពិតប្រាកដ ឬក៏​វៀតណាម​ចង់​សម្តៅ​ទៅ​វត្តមាន​កាន់តែ​ច្រើន និង​ឥទ្ធិពល​របស់​ចិន​កាន់តែ​ខ្លាំង​នៅ​កម្ពុជា​នោះ​ទេ។

ទីភ្នាក់ងារ​សារព័ត៌មាន​វៀតណាម (Vietnam News Agency – VNA) រាយការណ៍​ជា​ភាសា​អង់គ្លេស កាលពី​ថ្ងៃទី២៧ វិច្ឆិកា ក្នុង​ជំនួប​ទ្វេភាគី​ជាមួយ​លោក ប្រាក់ សុខុន នាយករដ្ឋមន្ត្រី​វៀតណាម លោក ង្វៀន សួនហ្វ៊ុក ប្រាប់​ទៅ​លោក ប្រាក់ សុខុន ឲ្យ​បន្ត​ធ្វើ​ការងារ​ឲ្យ​បាន​កាន់តែ​ជិតស្និទ្ធ​ជាមួយ​អាជ្ញាធរ​ពាក់ព័ន្ធ និង​អាជ្ញាធរ​មូលដ្ឋាន​កម្ពុជា​ខ្លួនឯង ជុំវិញ​រឿង​ចម្រូងចម្រាស​នៃ​ការ​បំឡាស់​ទីលំនៅ​ផ្ទះ​បណ្ដែត​ទឹក​របស់​អាណិកជន​វៀតណាម ដែល​កំពុង​រស់​នៅ​លើ​ផ្ទៃ​បឹង​ទន្លេសាប ក្នុង​ខេត្ត​កំពង់ឆ្នាំង ដើម្បី​ឲ្យ​ពួកគេ​មក​តាំងទី​លំនៅ​លើ​ដី​គោក​វិញ ឲ្យ​បាន​ដូច​តាម​អ្វី​ដែល​លោក ហ៊ុន សែន បាន​ដាក់​ចេញ។

ជា​កិច្ច​ឆ្លើយតប លោក ប្រាក់ សុខុន បាន​ធានា​អះអាង​ប្រាប់​ទៅ​នាយករដ្ឋមន្ត្រី​វៀតណាម​វិញ​ថា អាជ្ញាធរ​ខេត្ត​របស់​កម្ពុជា មាន​គម្រោង​សាងសង់​លំនៅឋាន​ថ្មី សម្រាប់​ផ្ដល់​ដល់​អាណិកជន​វៀតណាម ដែល​នឹង​ត្រូវ​រើ​ទីលំនៅ​ទៅ​នៅ​ទី​គោក​វិញ​ទាំងនោះ ដោយ​លោក​បង្ហាញ​ការ​ជឿជាក់​ថា ភាគី​ទាំងពីរ នឹង​អាច​សម្រេច​បាន​នូវ​ដំណោះស្រាយ​សមស្រប​មួយ​នា​ពេល​អនាគត​ដ៏​ខ្លី​ខាងមុខនេះ។ លោក ប្រាក់ សុខុន ក៏បាន​សន្យា​ជាមួយ​ភាគី​វៀតណាម​ថា នឹង​ធ្វើ​ការងារ​ឲ្យ​បាន​កាន់តែ​ជិតស្និទ្ធជាមួយ​រដ្ឋមន្ត្រីការបរទេស​វៀតណាម ផ្អែកលើ​សមិទ្ធិ​ផលកាល​ពី​ពេល​អតីតកាល​រវាង​ប្រទេស​ទាំងពីរ។ លោក ប្រាក់ សុខុន បាន​ពន្យល់​ប្រាប់​ទៅ​ភាគី​វៀតណាម​វិញ​ថា លោក​តែងតែ​ផ្ដោត​អាទិភាព ទៅលើ​ការ​អភិវឌ្ឍ ភាពជា​អ្នកជិតខាង​ក្នុងនាម​ជា​មិត្ត​ល្អ កិច្ច​សហ​ប្រតិ្តបត្តិ​ការ​ប្រកបដោយ​ភាព​ទូលំទូលាយ និង​សាមគ្គីភាព​រវាង​ប្រទេស​ទាំងពីរ។

អាស៊ីសេរី​មិនទាន់​អាច​ទាក់ទង​មន្ត្រី​នាំ​ពាក្យ​ក្រសួងការបរទេស ជុំវិញ​ការ​មិន​បញ្ចេញ​ព័ត៌មាន​ជុំវិញ​បញ្ហា​ចម្រូងចម្រាស​និគមជន​ជាតិ​វៀតណាម​រស់នៅ​លើ​បឹង​ទន្លេសាប បាន​នៅឡើយ​ទេ កាលពី​ថ្ងៃទី ២៩ វិច្ឆិកា។

នេះ​មិនមែន​ជា​លើកទីមួយ​ទេ ដែល​លោក ប្រាក់ សុខុន ទទួលរង​នូវ​ការ​បង្គាប់​បញ្ជា​ពី​ភាគី​វៀតណាម​នេះ។ កាលពី​អំឡុង​ពេល​ទៅ​ចូលរួម​កិច្ចប្រជុំ​កំពូល​អាស៊ាន​លើក​ទី ៣៣ នៅ​សិង្ហបុរី កាលពី​ថ្ងៃទី១៣ វិច្ឆិកា រឿង​បំឡាស់​ទី​និគមជន​វៀតណាម​បណ្ដែត​ទឹក​នៅ​លើ​បឹង​ទន្លេសាប​នេះ ក៏​ត្រូវ​បាន​រដ្ឋមន្ត្រីការបរទេស​វៀតណាម​លោក ផាម ប៊ិ​ញមិញ (Pham Binh Minh) លើកឡើង ជាមួយ​លោក ប្រាក់ សុខុន ដែរ​។ ពេលនោះ លោក ប្រាក់ សុខុន បាន​សន្យា​ជាមួយ​ភាគី​វៀតណាម​វិញ​ថា របប​ក្រុងភ្នំពេញ នឹង​ជួយ​ផ្តល់​ការ​ជួយ​គាំទ្រ​ដល់​និគមជន​វៀតណាម​ទាំងនោះ ដើម្បី​ទៅ​តាំងទី​លំនៅ​ថ្មី​នៅ​លើ​តំបន់​ដីគោក​វិញ ដោយ​សន្យា​ថា​នឹង​បង្កើត​នូវ​លក្ខខណ្ឌ ដែល​លោក​ហៅថា «​ប្រសើរ​បំផុត​» សម្រាប់​និគមជន​វៀតណាម ក្នុង​ការ​ទៅ​តាំងទី​លំនៅ​ថ្មី។

ក្រៅពី​ការ​បង្គាប់​បញ្ជា​របស់​នាយក​រដ្ឋមន្ត្រី​វៀតណាម​នេះ លោក ង្វៀន សួនហ្វ៊ុក ក៏បាន​ស្នើ​ក្រសួង​ការបរទេស​កម្ពុជា និង​វៀតណាម ឲ្យ​បន្ត​ពិនិត្យមើល​ឡើងវិញ​នូវ​រាល់​កិច្ចព្រមព្រៀង​កម្រិត​ខ្ពស់​នានា និង​ធ្វើការ​កែ​លម្អ​ឡើងវិញ​នូវ​ចំណុច​ខ្វះខាត​មួយ​ចំនួន ពាក់ព័ន្ធ​នឹង​កិច្ច​សហប្រតិបត្តិការ​រវាង​ប្រទេស​ទាំងពីរ លើ​វិស័យ​ពាណិជ្ជកម្ម វិនិយោគ ដឹកជញ្ជូន កសិ​រុក្ខកម្ម ការ​បណ្ដុះបណ្ដាល និង​ការអប់រំ។ នាយករដ្ឋមន្ត្រី​វៀតណាម លោក ង្វៀន សួនហ្វ៊ុក ក៏​មាន​បំណង​ចង់​ឲ្យ​កម្ពុជា និង​វៀតណាម រួមគ្នា​ប្រារព្ធ​ខួប​អនុស្សាវរីយ៍​លើក​ទី ៤០ នៅ​ថ្ងៃទី៧ មករា ដែល​វៀតណាម​បាន​លើកទ័ព​ចូល​លុកលុយ​កម្ពុជា តែ​ក្រោយមក​ត្រូវ​ប្រទេស​ទាំងពីរ​ហៅថា​ជា «​ទិវា​ជ័យជម្នះ​លើ​របប​ប្រល័យពូជសាសន៍​» ដើម្បី​ជា​ការ​ឆ្លុះបញ្ចាំង​ពី​សាមគ្គីភាព​ជ្រាលជ្រៅ និង​លើកកម្ពស់​ការ​យល់ដឹង​រវាង​ប្រជាជន​នៃ​ប្រទេស​ទាំងពីរ អំពី​សារៈសំខាន់​នៃ​ប្រវត្តិសាស្ត្រ​នេះ។

យ៉ាងណាក៏ដោយ គេ​នៅ​មិនទាន់​ដឹង​នៅឡើយ​ទេ ថា​តើ​ភាគី​វៀតណាម នឹង​បន្ត​លើក​យក​បញ្ហា​នេះ​មក​និយាយ​ជាថ្មី​ម្តង​ទៀត នៅ​ក្នុង​ដំណើរ​ទស្សនកិច្ច​របស់​លោក ហ៊ុន សែន និង​ព្រះមហាក្សត្រ ព្រះបរមនាថ នរោត្តម សីហមុនី ទៅកាន់​ទីក្រុង​ហាណូយ នៅ​ខែ​ធ្នូ​ខាងមុខនេះ ឬក៏​យ៉ាងណា​នោះ៕

Posted in Nokor | Tagged , | Leave a comment

ម៉ែន ណាត ផ្តល់យោបល់ទៅ ហ៊ុន ម៉ាណែត គួរកុំបន្តកេរ​តំណែល​​បែបផ្តាច់ការ​របស់ ហ៊ុន សែន ជាការដោះស្រាយបញ្ហាជាតិ និងពលរដ្ឋរួមគ្នា

ម៉ែន ណាត ពីអាស៊ីសេរី
ខណៈពេលលោក ហ៊ុន ម៉ាណែត ប្រាប់កងទ័ពជើងគោករបស់លោក ឱ្យ​ការពារ​របប​ ហ៊ុន សែន ជាមរតកផ្តាច់ការរបស់ឪពុកលោក​ ដើម្បីប្រឆាំង​នឹង​ក្រុម​អ្នក​មាន​ទស្សនៈ​ផ្ទុយ ភ្លាមនោះក៏មានប្រតិកម្មជាច្រើនតបទៅលោក ហ៊ុន ម៉ាណែត វិញ។ ក្នុងនោះមានលោក ម៉ែន ណាត បានប្រាប់ទៅវិទ្យុអាស៊ីសេរី RFA ឲ្យលោក ហ៊ុន ម៉ាណែត គួរកុំដើរតាមរបៀបដឹកនាំរបស់ឪពុកលោក ដែលជាការដោះស្រាយបញ្ហាជាតិ និងពលរដ្ឋរួមគ្នា។

លោក ម៉ែន ណាត ថ្លែងថា «យើងជាខ្មែរ យើងមាន​វប្បធម៌​ខ្មែរដូចគ្នា យើង​គោរពពុទ្ធសាសនាដូច​គ្នា យើង​អត់​ពិបាក​ទេ ហើយយើង​ធ្វើការ​កែតម្រូវ​ទៅ កុំ​ស្តីបន្ទោសពួក​អ្នក​ប្រឆាំង។ គេ​ប្រឆាំង​យើង​ដោយសារ​​ឃើញ​យើង​ដឹក​នាំ​មិន​ល្អ ហើយ​គេ​ប្រឆាំង​ហ្នឹង គឺ​ជា​ការ​ផ្តល់យោបល់ (ដូច្នេះយើង​កែទម្រង់​ទៅ។ ហើយ​អ្វី​ដែល​សហភាព​អឺរ៉ុប អង្គការ​សហប្រជាជាតិ ឬ​សហរដ្ឋ​អាមេរិក​ គេ​ផ្តល់​យោបល់​ឱ្យ​យើង ត្រូវ​តែ​ស្តារ​​លិទ្ធិប្រជាធិបតេយ្យឡើង​វិញ យើង​នាំគ្នា​ស្តារ​ទៅ។ យើង​ទៅព្រមាន​គេ​ធ្វើស្អីកាល​ណា​យើង​ព្រមាន​កាន់តែខ្លាំង វាធ្វើ​ឱ្យ​គេ​ប្រឆាំង​កាន់តែខ្លាំង។ ដូច្នេះ (ហ៊ុនម៉ាណែត ក៏ដោយ លោក ហ៊ុន សែន ក៏ដោយ គួរតែ​ពិចារណាឡើងវិញដែរ។ ករណី​កម្ពុជា​ហ្នឹង យើង​ត្រូវ​តែ​ដោះស្រាយដោយ​ខ្លួន​ឯង»


លោក ហ៊ុន ម៉ាណែត ប្រាប់កងទ័ពឱ្យ​ការពារ​របប​ឪពុក​លោក​ ប្រឆាំង​នឹង​ក្រុម​អ្នក​មាន​ទស្សនៈ​ផ្ទុយ

(RFA Khmer, 21-11-2018)
កូន​ប្រុស​ច្បង​លោក ហ៊ុន សែន គឺលោក​ ហ៊ុន ម៉ាណែត ប្រាប់​កង​ទ័ពឱ្យ​ការពាររបបដឹក​នាំ​របស់​ឪពុក​លោក និង​ប្រឆាំង​តប​តចំពោះ​​សកម្មភាព​របស់​ក្រុម​អ្នក​ប្រឆាំង​នៅក្រៅ​ប្រទេស។ អ្នក​ឃ្លាំមើល​សង្គម​យល់ថា លោក​ ហ៊ុន ម៉ាណែត​ កំពុង​បង្ហាញ​ពី​ចរឹត​កាងកាច​​ដូច​ឪពុក​របស់​លោក​ដែរ ដែល​នេះ​មិន​មែន​ជា​បច្ច័យ​ល្អ​សម្រាប់​ជីវិត​នយោបាយ​របស់​លោក​ទៅ​ថ្ងៃអនាគត​ឡើយ​។

អគ្គមេបញ្ជាការរង​នៃ​កង​យោធពលខេមរភូមិន្ទ និង​ជា​មេបញ្ជាការកងទ័ពជើង​គោក លោក ហ៊ុន ម៉ាណែត ហៅ​ក្រុម​អ្នក​ប្រឆាំង​នៅក្រៅ​ប្រទេស​ ថា​ជា​ក្រុម​ជន​អគតិ ជន​ក្បត់​ជាតិ​ និង​ជា​ក្រុម​វង្វេង​ជាតិ​បម្រើ​បរទេស​។ លោក​បាន​ណែនាំកង​ទ័ពឱ្យ​ប្រឆាំង​​​ដាច់​ខាត ​រាល់​អំពើ​រំលោភ​​បំពាន​ច្បាប់ ​ដែល​ក្រុម​នេះ​បង្កឡើង និងមិន​ត្រូវ​ទុក​ឱ្យ​ក្រុម​នេះ​បន្ត​បំផ្លាញជាតិ​តទៅ​ទៀត​ឡើយ។

លោក​ ហ៊ុន ម៉ាណែត បាន​ប្រាប់ទៅ​​នាយទាហាន​ នាយទាហាន​រង និង​ពលទាហាននៅក្នុង​ពិធីបិទវគ្គ​យោធា មួយកាលពីថ្ងៃទី ១៩ វិច្ឆិកា​ថា យោធាត្រូវស្វែង​​​យល់​ពីការ​រីកចម្រើន​របស់​ជាតិ និង​អនុវត្ត​ដោយ​ម៉ឺងម៉ាត់តាម​ការ​​ដឹកនាំ​របស់​ឪពុកលោក​​ ព្រម​ទាំងត្រូវ​ការពារ​របបថ្មី​ដែលកើត​ចេញ​ពី​ការ​បោះឆ្នោត​បែប​បង្គ្រប់​កិច្ច​ កាល​ពី​ចុង​ខែ​កក្កដា កន្លង​ទៅ នោះ​ផងដែរ​។ ជាពិសេស​ លោកបាន​ប្រាប់​ទៅកង​ទ័ព​ថា ទោះក្នុង​តម្លៃ​ណាក៏​ដោយ​ គឺត្រូវការ​ពារ​​​នូវអ្វី​ដែល​ឪពុករបស់​លោក​ គឺលោក ហ៊ុន សែន ហៅ​ថាជា ​សុខ​សន្តិភាព និង​ការ​អភិវឌ្ឍនោះ ឱ្យ​បាន​ជា​ដាច់​ខាត ដោយ​មិនត្រូវ​ឱ្យជន​ណាម្នាក់​មក​បំផ្លាញសមិទ្ធិផល​​ទាំងនេះ​ឡើយ​។

ប្រធាន​ក្រុម​ប្រឹក្សា​ឃ្លាំមើល​កម្ពុជា ប្រចាំ​ប្រទេស​ន័រវេស (Norway) លោក ម៉ែន ណាត ថ្លែង​ថាលោក​ ហ៊ុន ម៉ាណែត ជា​បញ្ញវន្ត​បញ្ចប់​ការ​សិក្សា​ពី​សាលាយោធាជាន់ខ្ពស់​របស់​អាមេរិក និង​​មាន​ការ​រំពឹង​ទុក​ច្រើនថា ជា​អ្នក​អាច​​​ជួយ​កែ​ទម្រង់របៀប​ដឹក​នាំរបស់ឪពុកលោក​បាន។ ក៏​ប៉ុន្តែ​បន្តិច​ម្តងៗ លោក​ ហ៊ុន ម៉ាណែត បែរ​ជា​បាន​​បង្ហាញ​ថា លោក​មាន​ចរឹតកោងកាច និង​សាហាវ​ឃោរឃៅ​ មិន​ខុស​ពី​​ពួក​ខ្មែរ​ក្រហម​ និង​ឪពុករបស់​លោក​ឡើយ​។

លោក ម៉ែន ណាត ​ថាលោក ហ៊ុន ម៉ាណែត កំពុង​តែ​សម្លាប់​ជីវិត​នយោបាយ​របស់ខ្លួន ​នៅ​ថ្ងៃអនាគត នៅ​ពេល​លោក​បង្ហាញ​ថា អ្នក​មាន​ទស្សនៈខុស​ពី​របប​ដឹកនាំបច្ចុប្បន្ន​ គឺ​ជា​ក្រុម​ក្បត់​ជាតិ និង​បម្រើ​បរទេស​បែប​នេះ។ ម្យ៉ាងវិញ​ទៀត ការ​ថ្លែង​បែប​នេះ ក៏​រំលោភ​លើ​អព្យា​ក្រឹត្យ​ភាព​របស់​កងទ័ព រដ្ឋធម្មនុញ្ញ និង​​កិច្ច​ព្រម​ព្រៀង​​សន្តិភាព​ទីក្រុង​ប៉ារីស​ ផង​ដែរ៖ «អ្វី​ដែល​ ហ៊ុន ម៉ាណែត លើក​ឡើង ឆ្លុះ​បញ្ចាំង​អំពីការ​ការពារ​ទ្រព្យ​សម្បត្តិ​ឪពុកគាត់ កេរដំណែល​ឪពុក​គាត់ទាំងអំណាច និង​ទ្រព្យ​សម្បតិ្ត​ទាំងអស់ដែល​គាត់បាន​រាប់​ពាន់លានដុល្លារ​ពី​ការ​កេង​ប្រវ័ញ្ច​ជាតិហ្នឹង។ នេះ​ជា​ការ​លើក​ឡើង​របស់​គាត់បែប​ផ្តាច់ការ​ ដូចប្រទេស​កូរ៉េខាង​ជើងអ៊ីចឹង បើ​និយាយ​ពី​ប្រទេស​ក្នុង​តំបន់។ ហ៊ុន ម៉ាណែត ថាត្រូវ​តែ​ការពារ​អ្វី​ដែល​កម្ពុជា​កំពុង​មាន​បច្ចុប្បន្ន ដោយ​គាត់​មិន​ខ្វល់​ថា តើ​របបហ្នឹង​អ្នក​ណា​ទទួល​ស្គាល់ ឬមិន​ទទួល​ស្គាល់​នោះ​ គឺអត់សំខាន់​ទេ។ សំខាន់គាត់​ត្រូវ​តែ​បន្ត​អំណាច ហើយ​ប្រើ​អំណាច​យោធា​ហ្នឹង ដើម្បី​គ្រប់​គ្រងប្រទេស»

អ្នក​ឃ្លាំមើលសង្គម​រូប​នេះ​ ថ្លែង​ថា លោក​ ហ៊ុន ម៉ាណែត គួរ​តែ​កុំ​បន្ត​កេរដំណែល​ផ្តាច់​ការ​របស់​លោក​ ហ៊ុន សែន បែប​នេះ​ទៀត ដោយ​គួរ​តែ​បង្វែរ​មក​គិត​រឿង ​ស្តារស្ថានការណ៍​នយោបាយ​ឡើងវិញ ខណៈកម្ពុជា​កំពុង​ប្រឈម​នឹង​ទណ្ឌកម្ម ​ពី​ក្រុម​ប្រទេស​​ប្រជាធិបតេយ្យ​លោក​ខាង​លិច៖ «មាន​វប្បធម៌​ខ្មែរដូចគ្នា យើង​គោរពពុទ្ធសាសនាដូច​គ្នា យើង​អត់​ពិបាក​ទេ ហើយយើង​ធ្វើការ​កែតម្រូវ​ទៅ កុំ​ស្តីបន្ទោសពួក​អ្នក​ប្រឆាំង។ គេ​ប្រឆាំង​យើង​ដោយសារ​ឃើញ​យើង​ដឹក​នាំ​មិន​ល្អ ហើយ​គេ​ប្រឆាំង​ហ្នឹង គឺ​ជា​ការ​ផ្តល់យោបល់ (ដូច្នេះយើង​កែទម្រង់​ទៅ។ ហើយ​អ្វី​ដែល​សហភាព​អឺរ៉ុប អង្គការ​សហប្រជាជាតិ ឬ​សហរដ្ឋ​អាមេរិក​គេ​ផ្តល់​យោបល់​ឱ្យ​យើងត្រូវ​តែ​ស្តារ​​លិទ្ធិប្រជាធិបតេយ្យឡើង​វិញ យើង​នាំគ្នា​ស្តារ​ទៅ។ យើង​ទៅព្រមាន​គេ​ធ្វើស្អីកាល​ណា​យើង​ព្រមាន​កាន់តែខ្លាំង វាធ្វើ​ឱ្យ​គេ​ប្រឆាំង​កាន់តែខ្លាំង ដូច្នេះ (ហ៊ុនម៉ាណែត ក៏ដោយ លោក ហ៊ុន សែន ក៏ដោយ គួរតែ​ពិចារណាឡើងវិញដែរ។ ករណី​កម្ពុជា​ហ្នឹង យើង​ត្រូវ​តែ​ដោះស្រាយដោយ​ខ្លួន​ឯង»

លោក​ ហ៊ុន ម៉ាណែត ត្រូវ​បាន​​តែង​តាំង​ជា​មេបញ្ជាការ​កង​ទ័ព​ជើង​គោក ​ជំនួស​លោក មាស សុភា ដែល​ជា​មនុស្ស​ជំនិត​របស់​ លោក ហ៊ុន សែន នៅក្រោយ​ការ​បោះឆ្នោត​បែប​បង្រ្គប់​កិច្ច​។ ក្រសួង​ការពារ​ជាតិ​ថែម​ទាំង​បាន​ផ្ទេរ​អង្គភាព​យោធា​សំខាន់ៗ​ ចំនួន ៥ ដែល​ធ្លាប់​ស្ថិត​ក្រោម​អគ្គបញ្ជាការដ្ឋាន​នៃ​កង​យោធោពលខេមរ​ភូមិន្ទ ឱ្យ​ស្ថិត​ក្រោម​បញ្ជាការដ្ឋាន​កង​ទ័ពជើង​គោក​វិញ​ ដែល​នេះ​គឺ​ជាការ​​ផ្តល់​អំណាច​យ៉ាង​ច្រើន​សម្បើម​ដល់​ លោក​ ហ៊ុន ម៉ាណែត​។ លោក​ ហ៊ុន សែន បាន​ចេញ​មុខ​​ការពារថា ការ​តែង​តាំង​នេះ​ដោយ​សារ​កូន​របស់​លោក​​មាន​សមត្ថភាពគ្រប់​គ្រាន់ និង​មាន​សញ្ញាបត្រ​ថ្នាក់​បណ្ឌិត​។

ទោះជាយ៉ាងណា អ្នក​វិភាគ និង​អ្នក​ឃ្លាំមើលសង្គម​ អះអាង​ដូច​គ្នា​ថា និន្នាការ​បែបនេះ គឺជា​ការ​ប្រមូល​ផ្តុំ​អំ​ណាចរបស់​ក្រុម​គ្រួសារ​លោក ហ៊ុន សែន​ និង​ជាការ​ប្រែក្លាយ​កម្ពុជា​ឱ្យ​ទៅ​ជា​ប្រទេស​ទាយាទស្នង​ត្រកូល​ទៅ​វិញ​ទេ ព្រោះកូន​បង្កើត​ និង​កូន​ប្រសារ​របស់​លោក ហ៊ុន សែន ​សុទ្ធតែ​ត្រូវ​បាន​តែ​ងតាំង​ជា​មន្ត្រី​ៗ​កំពូល​ក្នុង​ជួរកង​ទ័ព ប៉ូលីស ​ស្ថាប័ន​ស៊ីវិល​ និង​នៅ​ស្ថាប័ន​នីតិបញ្ញតិ ខណៈ​​ត្រកូល​ “ហ៊ុន” កំពុង​​​ក្តោបក្តាប់​ជំនួញ​ជា​ច្រើន​មុខ​នៅ​កម្ពុជា៕

CaptureefefCaptureេថេថេ

Posted in Nokor | Tagged , , , , | Leave a comment

សភា​សិទ្ធិមនុស្ស​ ASEAN​ ទទូច​ក្រុម​មេដឹកនាំ​អាស៊ាន ​​ដាក់​សម្ពាធ​ កម្ពុជា ​និង ​ភូមា ក្នុងកិច្ចប្រជុំកំពូល នៅសិង្ហបុរី​

99C0D7AA-0D15-4A0A-B83B-7E4A6C232ABB_cx15_cy13_cw63_w1023_r1_s

ក្រុម​សមាជិកសភា​មួយ​ចំនួន ​នៅ​សមាគម​អាស៊ាន​ បាន​ទាម​ទារ​មេដឹកនាំ​ទាំង​ឡាយ ​ក្នុង​សមាគម​នេះ​  ​ឱ្យ​ដាក់​ការ​គាប​សង្កត់​លើ​ប្រទេស​កម្ពុជា​ ចំពោះ​ការ​ធ្វើ​ឲ្យ​ដំណើរ​ការ​ប្រជាធិបតេយ្យ​ ធ្លាក់​ចុះ​, ការ​លុបបំបាត់​ចោល​សារព័ត៌មាន​ឯករាជ្យ​ ​ការ​ដាក់​ឃុំឃាំង​សកម្មជន​សិទ្ធិ​មនុស្ស​ និង​ការ​រំលាយ​ចោល ​គណបក្ស​ប្រឆាំង។


(VOA Khmer /ដោយ ហ៊ុល រស្មី /10 th-11-2018)
មេដឹកនាំ​នៅ​ក្នុង​ប្រទេស​សមាជិក ​សមាគម​ប្រជាជាតិ​អាស៊ី​អាគ្នេយ៍​ ​ហៅ​កាត់​ថា​ ​អាស៊ាន (ASEAN) ត្រូវ​តែ​ដាក់​បញ្ហា​សិទ្ធិមនុស្ស​ ក្នុង​នោះ​មាន​វិបត្តិ​នៅ​ប្រទេស​កម្ពុជា ​និង ​មីយ៉ាន់ម៉ា​ ​ឲ្យ​ស្ថិត​លើ​ចំណុច​កំពូល​នៃ ​របៀបវារៈ​កិច្ច​ប្រជុំ​កំពូល​អាស៊ាន​ ដែល​គ្រោង​នឹងធ្វើ​ឡើង​រយៈពេល​ ៣ ថ្ងៃ ​នៅប្រទេស​សិង្ហបុរី​ នា​សប្ដាហ៍​ខាងមុខនេះ។​ ​នេះ​បើ​តាម​សេចក្ដី​ប្រកាស​មួយ ​របស់​ក្រុម​សមាជិក​សភា​អាស៊ាន​ដើម្បី​សិទ្ធិ​មនុស្ស​ (ASEAN Parliamentarians for Human Rights) ហៅ​កាត់​ថា​ ​APHR ដែល​ ​VOA​ ​បាន​ទទួល​នៅ​ថ្ងៃ​សុក្រ ទី០៩ វិច្ឆិកា។​

ការ​ស្នើ​របស់​ ក្រុម​សមាជិកសភាអាស៊ាន​ដើម្បី​សិទ្ធិមនុស្ស​ ​ដែល​ដឹកនាំ​ដោយ​លោក​ Charles Santiago ​សមាជិក​សភា​ប្រទេស​ម៉ាឡេស៊ី​ ធ្វើ​ឡើង​នៅ​ចំ​ពេល​ប្រទេស​កម្ពុជា​ កំពុង​ប្រារព្ធ​ខួប​លើក​ទី​៦៥​ ឆ្នាំ​នៃ​បុណ្យ​ឯករាជ្យ​ជាតិ​របស់​ខ្លួន​ ពី​ប្រទេស​បារាំង។​ ​ក្រុម​សមាជិក​សភា​ដដែល​នេះ​ ក៏​បាន​លើកឡើង​ថា​ កិច្ច​ប្រជុំ​កំពូល​អាស៊ាន​ ដែល​គ្រោង​នឹង​ធ្វើ​នៅ​សិង្ហបុរី នៅ​សប្ដាហ៍​ក្រោយ គឺជា​កិច្ច​ប្រជុំ​កំពូល​លើក​ដំបូង​បង្អស់ ​ ​ចាប់តាំង​ពី​ការ​បោះឆ្នោត​ នៅ​កម្ពុជា កាលពី​ថ្ងៃ​ទី​ ២៩ ខែ​កក្កដា​ ​ដែល​បាន​ប្រែក្លាយ​ប្រទេស​នេះ​ ​ឲ្យ​ទៅ​ជា​រដ្ឋ​មួយ​ ដឹកនាំ​ដោយគណបក្ស​តែ​មួយ​ ដោយ​រលូន។​

លោក​ ​Charles Santiago​ ​ដែល​ជា​ប្រធាន​ក្រុមប្រឹក្សាភិបាល​នៃ APHR ត្រូវ​បាន​គេ​ស្រង់​សំដី​ ក្នុង​សេចក្ដី​ប្រកាស ​ចុះ​ថ្ងៃ​ទី​៩​ ​ខែ​វិច្ឆិកា​ ​តាម​ន័យ​ដើម​ថា៖​ «សិទ្ធិ​មនុស្ស​ បាន​ស្ថិត​ក្រោម​ការ​គំរាមកំហែង​ នៅ​ទូទាំង​អាស៊ីអាគ្នេយ៍។​ ​គោល​ការណ៍​មិន​ជ្រៀត​ជ្រែក​ដ៏​បំផ្លិចបំផ្លាញ​របស់​ អាស៊ាន​ មានន័យថា​ ប្លុក​នេះ​ មិន​មាន​ទាំង​ឆន្ទៈ​ និង​លទ្ធភាព​ ដើម្បី​ចាត់​ការ​ប្រឆាំង​នឹង​ការ​រំលោភ​បំពាន​នានា​នោះ​ទេ។​ ​កង្វះ​នៃ​ចំណាត់​ការ​នេះ​ ត្រូវតែ​បញ្ចប់។ សិទ្ធិ​មនុស្ស​ គួរ​តែ​ស្ថិត​នៅ​ចំណុច​កណ្ដាល​ នៃ​ការប្រជុំ​នៅ​សិង្ហបុរី​ សប្ដាហ៍​ខាង​មុខ​នេះ»។​

លោក​ ​Charles Santiago ​បាន​ថ្លែង​បញ្ជាក់​ដល់​ស្ថានភាព​កម្ពុជា​ តាម​ន័យ​ដើម​ថា៖​ «មេដឹកនាំ​អាស៊ាន​មិន​អាច​បណ្ដោយ​ឲ្យ​រដ្ឋាភិបាល​កម្ពុជា​ បាន​រួច​ខ្លួន​យ៉ាង​ស្រួល​ ជាមួយ​ការ​ធ្វើ​ឲ្យ​អន្តរាយលទ្ធិប្រជាធិបតេយ្យ​​នោះ​ទេ។​ ​ពួកគេ​ ត្រូវ​ជំរុញ​ឲ្យ​លោក​នាយក​រដ្ឋ​មន្ត្រី​ ​ហ៊ុន សែន​ ​បញ្ចប់​ការ​បង្ក្រាប​ លើ​អ្នករិះគន់​រដ្ឋាភិបាល​ និង​រៀបចំ​ការ​បោះឆ្នោត​ថ្មី​មួយ​ ដែល​ពិតប្រាកដ​ សេរី​ ​និង​យុត្តិធម៌»។

​សេចក្ដី​ប្រកាស​របស់​ ក្រុម​សមាជិក​សភា​អាស៊ាន​ដើម្បី​សិទ្ធិ​មនុស្ស​ ​បាន​ពណ៌នា​បន្ថែម​ថា​ ​លោក​ ​ហ៊ុន សែន​ ​នឹង​ចូលរួម​កិច្ចប្រជុំ​កំពូល​នេះ​ ​បន្ទាប់​ពីគណបក្ស​ប្រជាជន​កម្ពុជា ​ដែល​ជា​គណបក្ស​កាន់​អំណាច​របស់​លោក បាន​ឈ្នះ​យក​អាសនៈ​តំណាង​រាស្ត្រ​ទាំង ​១២៥ ​នៅ​រដ្ឋសភា​ជាតិ​ ​នៅ​ខែ​កក្កដា​ ក្រោយ​ការ​បោះ​ឆ្នោត​មួយ ​ដែល​ត្រូវ​បាន​គេ​ចាត់​ទុក​យ៉ាង​ទូលំទូលាយ​ថា​ ជា​ការ​បោក​បញ្ឆោត។​

ក្នុង​ដំណើរ​ឆ្ពោះ​ទៅ​កាន់​ការ​បោះឆ្នោត​ ​គណបក្ស​ប្រជាជន​ បាន​បង្កើន​តាក់តិច​គាបសង្កត់​ក្រុម​ជំទាស់​ ​ដោយ​ការ​បំបាត់​ចោល​ប្រព័ន្ធ​ផ្សព្វផ្សាយ​ឯករាជ្យ​ដែល​នៅ​សេសសល់​តិចតួច​ និង​ការ​បៀតបៀន​ ឃុំឃាំង​សកម្ម​ជន​សិទ្ធិមនុស្ស។​

ក្រុម​សមាជិក​សភា​អាស៊ាន​ដើម្បី​សិទ្ធិមនុស្ស​ ក៏បាន​ថ្កោលទោស​ដល់​ការ​រំលាយ ​គណបក្ស​ប្រឆាំង​ និង​ការ​ចោទប្រកាន់​មេដឹកនាំ​គណបក្ស​នេះ​ គឺ​លោក ​កឹម សុខា​ ពី​បទ​ក្បត់​ជាតិ​ ដែល​ផ្ដើម​ចេញ​ពី​ហេតុផល​នយោបាយ។ ពួកគេ​លើក​ឡើង​ថា បន្ទាប់ពី​ការ​បោះឆ្នោត​ជាតិ​កន្លងទៅ​ លោក​ ហ៊ុន សែន​ បាន​ផ្ដល់​សម្បទាន​ដោយអន្លើ​ តាម​ទម្រង់​នៃ​ការ​ដោះលែង ដែល​មាន​កំណត់​នូវអ្នកទោសនយោបាយ​ ប៉ុន្តែ​ច្បាប់​ដែល​មាន​លក្ខណៈ​រឹតត្បិត​ខ្លាំង​ និង​នាំ​ឱ្យ​មាន​ការ​ឃុំឃាំង​អ្នក​ទោស​នយោបាយ​ទាំងនោះ​ នៅ​បន្ត​មាន​នៅ​ឡើយ។​

អ្នកនាំពាក្យ​រដ្ឋាភិបាល ​លោក​ ​ផៃ ស៊ីផាន​ ​ទាត់​ចោល​ការ​អធិប្បាយ​នានា​ របស់​លោក ​Charles Santiago។ លោក​ ប្រាប់​ VOA ​នៅ​ថ្ងៃ​សុក្រ​ថា៖ «លោក​ម្នាក់​ហ្នឹង ដែល​លើក​ឡើង​ ជា​គំនិត​បិសាច ​ប្រឆាំង​ជាមួយ​នឹង​ប្រជាពលរដ្ឋ​កម្ពុជា​ ហើយ​លោក ​គ្មាន​សិទ្ធិ​អី​មក​ជ្រៀតជ្រែក​បញ្ហា​នេះ​ទេ​ ហើយ​ អាស៊ាន ​មិន​ទាន់​មាន​សមាជិក​ មិនទាន់​មាន​សភា​ អាស៊ាន​ នៅឡើយទេ​ ក៏ប៉ុន្តែ​គ្រាន់​តែ​ជា​សមាគម​តែ​ប៉ុណ្ណោះ។ ការ​លើកឡើង​ ជា​គំនិត​ ប្រកបដោយ​ការ​ឆ្កួតវង្វេង​ តែប៉ុណ្ណោះ​បាទ»។​

​អ្នក​នាំ​ពាក្យ​រដ្ឋាភិបាល​រូប​នេះ​ ​ក៏​បាន​ចំអក​ដល់​មេដឹកនាំ​ក្រុម​សមាជិក​សភា​អាស៊ាន​ដើម្បី​សិទ្ធិ​មនុស្ស​ ជា​ក្រុម​ដែល​មិន​យល់​គោល​ការណ៍​របស់​ សមាគម​អាស៊ាន​ ហើយ​ថា​ ​ក្រុម​នេះ​ ជា​សម្ព័ន្ធ​មិត្ត​ពួក​ឧទ្ទាម។​ «​គាត់​ជា​សម្ព័ន្ធមិត្ត​ ជាមួយ​ហ្នឹង​ ​ក្រុម​ឧទ្ទាម។ អ្វី​ដែល​គាត់​លើក​ឡើង​ហ្នឹង​ ជា​គំនិត​បិសាច​ ប្រឆាំង​នឹង​សន្តិ​ភាព​ ប្រឆាំង​នឹង​ឯករាជ្យភាព​ ប្រឆាំង​នឹង​ អាស៊ាន​ ជា​គោលការណ៍​មិន​លូក​ដៃ​នៅ​ មិន​ជ្រៀត​ជ្រែក​ជាមួយ​អ្នកណា​ទេ​ គាត់​គ្រាន់តែ​ជា​បិសាច​ឧទ្ទាមម្នាក់​ប៉ុណ្ណោះ»។​

ក្រៅពី​បញ្ហា​កម្ពុជា​ តំណាង​រាស្ត្រ​ក្នុង​តំបន់​ បាន​សង្កត់​ធ្ងន់​ថា​ ​កិច្ចប្រជុំ​កំពូល​អាស៊ាន​ ​ត្រូវតែ​ដាក់​បញ្ចូល​ផង​ដែរ ​នូវ​វិបត្តិ​ក្រុម​អម្បូរ​ ​Rohingya​ ​នៅ​ប្រទេស​មីយ៉ាន់ម៉ា​ ក្នុង​របៀប​វារៈ​របស់​ខ្លួន។​ ​កាល​ពី​ខែ​កញ្ញា​ ​ក្រុម​បេសកកម្ម​ស្វែង​រក​ការណ៍​ពិត​ឯករាជ្យ ​ចាត់តាំង​ដោយ​អង្គការ​សហ​ប្រជាជាតិ​ ​បាន​ចោទ​ប្រកាន់​យោធា​មីយ៉ាន់ម៉ា​ ចំពោះ​ការ​រំលោភ​បំពាន​យ៉ាង​សម្បើម ​នៅ​ក្នុង​រដ្ឋ​ Rakhine Kachin និង​ Shan ។​ ​ក្រុម​បេសកកម្ម​ បាន​ស្នើ​ឲ្យ​មន្ត្រី​យោធា​ជាន់​ខ្ពស់​មីយ៉ាន់ម៉ា​ ត្រូវ​ទទួលការ​ផ្ដន្ទាទោស ​ចំពោះ​ឧក្រិដ្ឋ​កម្ម​ប្រឆាំង​នឹង​មនុស្ស​ជាតិ​ ឧក្រិដ្ឋកម្ម​សង្គ្រាម​ និង​ប្រល័យ​ពូជ​សាសន៍។​ ​នេះ​បើ​យោង​តាម​សេចក្ដី​ប្រកាស​ដដែល​របស់​ ក្រុម​សមាជិក​សភា​អាស៊ាន​ដើម្បី​សិទ្ធិមនុស្ស។​

ក្រុម​សមាជិក​សភា​អាស៊ាន​ដើម្បី​សិទ្ធិ​មនុស្ស​ បាន​ឲ្យដឹង​ដែរ​ថា កន្លងមក​ខ្លួន​ ធ្លាប់​បាន​ទទូច​សុំ​ក្រុម​ប្រឹក្សា​សន្តិសុខ​អង្គការ​សហប្រជាជាតិ​ ​ឱ្យ​យក​ស្ថានភាព​ នៅ​ប្រទេស​មីយ៉ាន់ម៉ា​ ទៅ​ដាក់​នៅ​ តុលាការ​ឧក្រិដ្ឋកម្ម​អន្តរជាតិ​ផង​ដែរ៕

Posted in Nokor | Tagged , , , , , | Leave a comment

ពលរដ្ឋខ្មែរ-ន័រវេស៍ ស្នើទៅនាយករដ្ឋមន្រ្តី Erna Solberg លើកឡើងពីការស្ដារធិប្រជាធិបតេយ្យ នៅកម្ពុជា ក្នុងជំនួបជាមួយលោក ហ៊ុន សែន

44111002_1858214014274693_556812320601276416_n

ពលរដ្ឋខ្មែរ នៅប្រទេសន័រវេស៍ ស្នើទៅនាយករដ្ឋមន្រ្តីន័រវេស៍ (Norway) លើកឡើងពីការស្ដារលទ្ធិប្រជាធិបតេយ្យ នៅកម្ពុជា នៅចំពោះមុខលោក ហ៊ុន សែន ក្នុងជំនួបដោយឡែកមួយ នៅក្នុងកិច្ចប្រជុំកំពូលអឺរ៉ុប-អាស៊ី។

លោក គង់ ស៊ីម៉ន, លោក ម៉ែន ណាត, លោក ឆាំ ឆានី, លោក វិរះ យេន, លោក អៀ ចាន់ណា និងលោក ចៅ ទុយ ជាតំណាងស្ថាប័នសមាគម និងសង្គមស៊ីវិលខ្មែរ នៅប្រទេសន័រវេស៍ បានសរសេរលិខិត ទៅកាន់ នាយករដ្ឋមន្រ្តីន័រវេស៍ លោកស្រី អានណា ស៊ុលប៊ឺក (Erna Solberg) អំពីវិបត្តិដ៏ធ្ងន់ធ្ងរ នៅប្រទេស​កម្ពុជា ខណៈដែលលោកស្រី នឹងមានជំនួបដោយឡែក ជាមួយលោក ហ៊ុន សែន នៅក្នុងកិច្ចប្រជុំកំពូលអឺរ៉ុប-អាស៊ី នៅថ្ងៃទី ១៨-១៩ ខែតុលា ឆ្នាំ២០១៨ ។

ក្នុងខ្លឹមសារលិខិត បានស្នើទៅលោកស្រី Erna Solberg ឲ្យលើកឡើងនៅចំពោះមុខលោក ហ៊ុន សែន ពីការស្ដារ លទ្ធិប្រជាធិបតេយ្យឡើងវិញ នៅប្រទេសកម្ពុជា រួមមានការដោះលែងលោក កឹម សុខា ប្រធានគណបក្សសង្គ្រោះជាតិ និងអ្នកទោសមនសិការទាំងអស់ ឲ្យមានសេរីភាព ព្រមទាំងអនុញ្ញាតឲ្យថ្នាក់ដឹកនាំគណបក្សសង្គ្រោះជាតិ ទាំង ១១៨ រូប មានសិទ្ធិធ្វើនយោបាយឡើងវិញ។

លិខិតដដែល បានអំពាវនាវឲ្យរបប លោក ហ៊ុន សែន អនុញ្ញាតឲ្យក្រុមអង្គការសង្គមស៊ីវិល និងសហជីពឯករាជ្យ បំពេញតួនាទី និងមុខងាររបស់ខ្លួន ដោយគ្មានការគំរាមកំហែង និងគ្មានការបំផិតបំភ័យ ដូចនៅសង្គមប្រជាធិបតេយ្យផ្សេងៗទៀតផងដែរ។

ពលរដ្ឋខ្មែរនៅប្រទេសន័រវេស៍ បញ្ជាក់ថា រដ្ឋាភិបាលន័រវេស៍ បានជួយពួកគេ និងក្រុមគ្រួសារ ឲ្យបានរួចផុតពីការគាបសង្កត់ ពីសំណាក់របបលោក ហ៊ុន សែន និងបានជួយពួកគេឲ្យបានក៏សាងជីវិតថ្មី នៅលើទឹកដីប្រទេសន័រវេស៍។ យ៉ាងណាក៏ដោយ ពួកគេមិនអាចឈរមើលរបបលោក ហ៊ុន សែន បំផ្លាញលទ្ធិប្រជាធិបតេយ្យ និងសិទ្ធិមនុស្សនៅកម្ពុជាបាននោះទេ ជាពិសេសពួកគេ បារម្ភពីសុវត្ថិភាពក្រុមគ្រួសារពួកគេ ដែលកំពុងរស់នៅក្រោមរបបលោក ហ៊ុន សែន ដែលមានលក្ខណៈផ្ដាច់ការនោះ។ តំណាងពលរដ្ឋខ្មែរ នៅប្រទេសន័រវេស៍ ជឿជាក់ថា លោកស្រីនាយករដ្ឋមន្រ្តី អាណា ស៊ុលប៊ឺក នឹងយកចិត្តទុកដាក់ ចំពោះសំណើរខាងលើនេះ៕  (អត្ថបទដោយ CSCNews)

English: – Kristiansand, 16 Oct 2018

The Honorable Prime Minister Erna Solberg 
Prime Minister of Norway
Glacisgata 1 
0150 Oslo
Norway

Dear Prime Minister,

We write to you as Cambodian-Norwegians as we are informed of your meeting with Mr. Hun Sen at the 12th Asia Europe Meeting Summit in Brussels on 18-19 October, 2018.

The 29 July election was considered not free, not fair by the people of Cambodia and by the world community. The Cambodia National Rescue Party-the only credible opposition was unconstitutionally dissolved. Mr. Hun Sen continues to rule as his party controls the total 125 parliamentary seats. Cambodia has gone back to a one-party state as during the Khmer Rouge years and the period when the country was embargoed by the world community.

We are sincerely hopefully that you will raise with Mr. Hun Sen the necessity to restore democracy in Cambodia by releasing the leader of the opposition, Mr. KEM Sokha and all political prisoners. All charges must be dropped so that they can resume their political rights and other fundamental rights. Furthermore, members of the civil society and independent trade unions must be allowed to perform their roles and functions without fear and intimidation, as in any democratic society.

As students, human rights activists and civil servants, we survived oppression and escaped threats by the regime of Mr. Hun Sen. We have been given the protection and full rights by the government of Norway to rebuild a new life for ourselves and for our children in our new home- Norway. However, we cannot stand by to watch the regime of Mr. Hun Sen destroy democracy and demonstrate total disregard to fundamental human rights. We fear for the safety and security of our family members in Cambodia under the one-party regime of Mr. Hun Sen.

We sincerely trust that you will take into consideration our expressed request and pressing concerns.

Most respectfully,

Kong Simorn,
Leader of Cambodia National Rescue Party, NORWAY

Men Nath,
Leader, Cambodia Watchdog Council International, Norway

Chham Chhany,
Secretary of the Khmer Buddhist Society in Norway
Ir Channa,
Secretary General, Cambodia Watchdog Council International

Virak Yenn,
Leader of Cambodia Border Committee, Norway

Chau Tui,
Steering Committee member, the Khmer Buddhist Society in Norway44087373_1858199120942849_8367894360573870080_n (1)18275074_1651153984956774_254485478664091462_n27460032_1713183462074718_682769877597157942_n

 

Posted in Nokor | Tagged , , , , , , , | Leave a comment